BEMORI, 14 Jullu 2026 – Konstrusaun ba dapur merenda eskolar iha Eskola Ensinu Báziku Filiál Duque de Caxias Bemori, agora dadaun atinji ona pursentu ha’at nulo resin lima (45%) husi progresu ba obra refere.
Xefe Suku Bemori, Francisco Sequeira ba Ekipa Sentru Informasaun Suku Dijital (SISD) Bemori, Tersa-feira (14/07) hateten konstrusaun dapur merenda eskolar ne’e hanesan parte ida husi esforsu Governu liu husi programa Nasional Dezenvolvimentu Suku (PNDS) atu fó apoiu ba implementasaun programa merenda eskolar iha Eskola Ensinu Báziku Filiál Duque de Caxias Bemori.
Xefi suku mos haktuir projetu ne’e implementa husi PNDS atu suporta programa alimentasaun eskolar no hadi’a kondisaun estudante sira durante prosesu aprendizajen.
Tuir Sequeira, existénsia dapur ida ne’e, sei fasilita preparasaun ai-han ba estudante sira ho kondisaun ne’ebé di’ak liu, nune’e bele kontribui ba saúde, nutrisaun no hadi’a konsentrasaun estudante sira durante prosesu aprendizajen iha sala de aula.
Projetu konstrusaun dapur merenda eskolar ne’e hetan alokasaun orsamentu hamutuk rihun sanulo resin lima dollar Americano ($15.000) husi Programa Nasional Dezenvolvimentu Suku (PNDS), ne’ebe hahu husi fulan Maiu 2026 no tuir planu sei finaliza iha fulan Agostu 2026.
Hakerek nain : Equipa Sentru Informasaun Suku Dijital (SISD) – Bemori
Editor : Equipa Formador JPD – SEKOMS
